इंदापूर येथे बेकायदा जुगार क्लब राजरोयपणे सुरू, पोलीसांना लाखोंचा हप्ता?

बेकायदा जुगार क्लबमुळे कायदा-सुव्यवस्था ढासळण्याच्या मार्गावर

रायगड (प्रतिनिधी) :- माणगांव पोलीस स्टेशनच्या हद्दीत मुंबई-गोवा महामार्गावर इंदापूर येथे दिपक हॉटेलच्या बाजूला एका बंद रूममध्ये बेकायदा जुगार क्लब राजरोसपणे सुरू असून हा जुगार क्लब चालविणाऱ्यांनी पोलीसांना लाखोंचा हप्ता देऊन पोलीसांचे "तोंड" बंद केल्याची चर्चा या परिसरात सुरू आहे. 

हप्ता घेऊन अवैध जुगार क्लब ला पाठींबा देणाऱ्या पोलीसांवर कारवाई कधी होणार? असा सवाल या परिसरातील सूज्ञ नागरिकांकडून उपस्थित केला जात आहे. रायगड जिल्ह्याचे पोलीस अधीक्षक आणि महाराष्ट्राचे पोलीस महासंचालक यांनी हा अवैध जुगार क्लब तातडीने बंद करण्याची कारवाई करावी अशी मागणी या परिसरातील नागरिकांकडून व महिला वर्गाकडून केली जात आहे. 

सध्या माणगांव तालुक्यातील मुंबई-गोवा महामार्गावर असलेल्या दिपक हॉटेलच्या बाजूला एका बंद रूममध्ये हा जुगार क्लब चालू असल्याचे निदर्शनास आलेले आहे. या जुगाराच्या व्यसनाने सध्याची तरूण पीढी बिघडत चालली असून अनेकांचे संसार उध्वस्त होण्याच्या मार्गावर आलेले आहेत.

अनेक तरूण व वयोवृद्ध माणसे त्यांचा महिन्याचा पगार या जुगारामध्येच खर्च करीत असून अनेकांच्या कुटूंबात वाद-भांडणे सुरू असल्याचे दिसत आहे. या जुगारामध्ये एक वेळा योगायोगाने जिंकलेली व्यक्ती पुन्हा-पुन्हा जिंकण्याच्या आशेने आपली मेहनतीची कमाई वारंवार यामध्येच घालवित असल्याचे दिसत आहे. सदरचा बेकायदा धंदा या परिसरात राजरोसपणे सुरू असल्यामुळे या परिसरात कायदा व सुव्यस्था आहे का? असा प्रश्न सर्वसामान्य नागरिक व महिला वर्गासमोर उभा आहे